ADC pathum- Lai, Mara leh Chakma district council a CEM-te hi district hran hrana awm an nih avang leh Chief Minister hi Autonomous District Council chungchang leh dinhmunte sawipui an duh avangin, a ruala hmuho turin an inchahkhawm a, a rualin Aizawlah an kalkhawm ta a ni, an ti.

Chief Minister hmu tur hian Lalmuanpuia Punte, Adviser to CM in vawi-2 lai appointment a dil saka, Dr. Lorrain Lalpekliana Chinzah, Adviser to CM, Lawngtlai East Bialtu MLA ni bawk pawhin a dilsak a, Lawngtlai West Bialtu MLA C. Ngunlianchunga pawhin a dilpui a. Chu chauh ni lovin, M.Laikaw, CEM MADC pawhin ziakin, C.Muanthanga CEM LADC leh  Rishik Mohan Chakma CEM, CADC-teho nen, ADC CEM-3 te'n hmuh an duh thu ziakin a submit ve leh bawk a. Hei chauh hi a ni lo va, Aizawla Lai House enkawltu DRC pawhin ziakin CM hmuh phalna hi a dilsak leh bawk a, a chhanna hmuh a ni lo hi na kan ti hle, tiin an thuchhuah ah tarlan a ni.

Hetiang em em a kan Autonomous District Council a CEM-te meuhina a Bangalow lamah emaw, a Chamber-ah emaw pawh ni se, hmuh tuma kar khat chhung an beih laia an hmu thei lo vek leh chhanna mumal pawh engmah an hmu lo hi thil mak tak a ni, an ti bawk.

Siaha MNF chuan, hemi kar July ni 17, 2024 (Nilaini) khan Lawngtlai District ZPM OB-te leh Secretaries rual te'n Chief Minister hi In lama an hmu an ti a. ADC te aiawh CEM rualin an hmu thei bik lo hi Lai, Mara leh Chakma fate engahmah ngaihlohna leh hmusitnaah kan ngai lo thei lo a, pawi kan ti tak zet a ni, an ti.

Lalduhoma hian Siaha a MLA campaign laiin ZPM kan sawrkar hunah chuan, "Autonomous District Council-te hi kan ngai pawimawhin kan ngaihsak dawn a ni. Tuna an dil mek direct funding pawh hi tha takin kan re-comment dawn a ni," tia a sawi laia mipui kut beng nasa tak te, opposition an nih laia Assembly Session a ADC te thlavang a hauh der vel lai te leh tuna Mizoram CM a nih hnua a nungchang leh awm dan leh a thusawite kha a inperhsan hle a, lei leh van ang hial niin kan hria a, zahthlak pawh kan tiin pawi kan ti tak zet a ni. 'Sawi loh dana awm hi em ni kalphung thar chu ni dawn?,'  tih kan zawt a ni an ti.

District Council-ah hian eng party pawh sawrkar se, heti taka District Council aiawhte hmu duh lo Chief Minister hi tunhma, Mizoram UT kum 1972 atanga CM kan lo hrawn tawh chinah an la awm ngai lo. Tuna Chief Minister Lalduhoma chiah hi a la ni. MLA election dawna campaign laia mipui hmaa a intiam ang ngei khan, Autonomous District Council pathumte mamawh thlen an tum hi tha taka lo dawngsawng hram tawh turin kan ngen nghal bawk a ni, an ti a.

Lai, Mara leh Chakma te hmuhsittu Chief Minister hian Inthlan dawna dawta min rawn bum ang khan, dawt ringawta min bum leh turin a dam chhung zawng hian Lai, Mara leh Chakma ram leilungte hi a rawn rap leh ngam tawh ang em? tih hi kan zawhna a ni e, tiin an thuchuah ah tarlan a ni.